БАА Эрон фуқароларининг мамлакатга кириши ва транзитни таъқиқлади
Чеклов дарҳол кучга кириб, резидент визаси эгалари ҳам қамраб олинди.
Бирлашган Араб Амирликлари Эрон фуқароларининг мамлакат ҳудудига кириши ҳамда транзит орқали ўтишига чеклов жорий этди. Бу ҳақда Emirates авиакомпаниясининг расмий веб-сайтида эълон қилинган маълумотда қайд этилди.
Хабарга кўра, Эрон паспортига эга йўловчиларга БАА ҳудудига кириш ёки мамлакат аэропортлари орқали транзит парвозларни амалга ошириш тақиқланган. Мазкур чеклов дарҳол кучга кирган бўлиб, у барча Эрон фуқароларига, жумладан, амалдаги БАА резидент визасига эга шахсларга ҳам татбиқ этилади.
Бундан ташқари, flydubai авиакомпанияси ҳам Эрон фуқароларининг БААга киришига чеклов қўйилганини тасдиқлаган.
БАА расмийлари мазкур чеклов сабаблари юзасидан ҳозирча расмий изоҳ бермаган. Шу билан бирга, Яқин Шарқдаги кескин вазият фонида хавфсизлик чораларини кучайтириш бўйича қўшимча қарорлар қабул қилиниши мумкинлиги таъкидланмоқда.
