Эрон президенти урушни тўхтатиш шартини маълум қилди
Пезешкиан Европа давлатларини Эронга нисбатан сиёсатини халқаро ҳуқуқ асосида қайта кўриб чиқишга чақирди.
Масъуд Пезешкиан Эрон келажакда АҚШ ва Исроил томонидан тажовуз такрорланмаслигига аниқ кафолатлар берилган тақдирда ҳарбий ҳаракатларни тўхтатишга тайёр эканини билдирди. Бу ҳақда у Антонио Коста билан телефон орқали мулоқот чоғида маълум қилган дейди Interfax.
Эрон президенти сўзларига кўра, Теҳрон урушни тўхтатишни хоҳлайди, бироқ бу фақат келгусида ҳар қандай тажовуз қайта такрорланмаслиги бўйича зарур кафолатлар тақдим этилгандагина мумкин.
Пезешкианнинг таъкидлашича, Европа давлатлари Эронга нисбатан олиб бораётган сиёсатини қайта кўриб чиқиб, уни халқаро ҳуқуқ меъёрлари ҳамда конструктив ва профессионал ҳамкорлик тамойилларига асосланган ёндашув билан алмаштириши лозим.
Шунингдек, Эрон раҳбари айрим қўшни давлатлар ҳудудлари Эронга қарши ҳужумлар учун фойдаланилаётганини қайд этиб, бундай ҳолатларнинг олдини олиш бўйича тегишли мажбуриятлар бажарилмаган тақдирда жавоб чораларини кўришга мажбур бўлишини таъкидлади.
