Эрон урушининг иқтисодиётга таъсири ойлар давомида сезилади — Австралия бош вазири
Австарлия ҳукумати глобал иқтисодий босимлардан аҳолини тўлиқ ҳимоя қила олмаслигини билдирди.
Австралия бош вазири Антони Албанази Эрон билан боғлиқ можаро сабаб юзага келган иқтисодий беқарорлик бир неча ой давом этишини маълум қилди. Бу ҳақда BBC хабар берди.
Бош вазирнинг таъкидлашича, можаро тарихдаги энг катта ёнилғи нархи ошишига сабаб бўлган ва бу аллақачон аҳоли даромадларига босим ўтказмоқда.
“Австралия бу урушда иштирок этмаяпти, аммо унинг оқибатида барча юқори нархларни тўламоқда”, — деди Албанези.
Маълумотларга кўра, АҚШ ва Исроилнинг Эрон билан уруши ҳамда Ҳўрмуз бўғозининг амалда ёпилиши фонида дунё бўйлаб ёқилғи нархлари кескин ошган.
Албанези олдинда осон бўлмаган давр турганини тан олиб, ҳукумат глобал иқтисодий босимлардан аҳолини тўлиқ ҳимоя қила олмаслигини қайд этди.
Шу билан бирга, ҳукумат вақтинчалик чораларни эълон қилди: ёқилғи акцизи икки баробарга камайтирилади, оғир транспорт воситалари учун йўл тўловлари уч ойга бекор қилинади.
Бундан ташқари, ички таъминотни мустаҳкамлаш ва ёқилғи импортини ошириш бўйича чоралар кўрилмоқда.
Бош вазир фуқароларни ёқилғидан оқилона фойдаланишга чақириб, имкон қадар жамоат транспортидан фойдаланишни тавсия этди.
Шунингдек, ваҳимали харид қилишдан тийилиш кераклигини билдирди. Мурожаат якунида у мамлакатни бирликка чақириб, Австралия глобал муаммоларни “биргаликда ва ўзига хос тарзда” енгиб ўтишини таъкидлади.
