Исроил ҳужумлари оқибатида Байрутда 7 киши ҳалок бўлди
Шунингдек, “Ҳизбуллоҳ” Ливан жанубида Исроил қўшинларига қарши жанг қилмоқда.
Исроил ҳарбийлари Байрутнинг жанубий чекка ҳудудларига ҳужум уюштирди. Ҳарбийлар мазкур зарбалар юқори мартабали “Ҳизбуллоҳ” қўмондонини йўқ қилишга қаратилганини билдирди, дея хабар бермоқда Al Jazeera.
Ливан Соғлиқни сақлаш вазирлиги маълумотига кўра, ҳужумлар оқибатида камида 7 киши ҳалок бўлган. Жнаҳ ҳудудидаги зарбада 5 киши ҳалок бўлиб, 21 киши жароҳатланган, Халдеҳда эса яна 2 киши ҳалок бўлган.
Маҳаллий ОАВ ва манбалар зарба турар жойга эмас, балки автомобилларга қаратилган бўлиши мумкинлигини айтган.
Шунингдек, “ Ҳизбуллоҳ” Ливан жанубида Исроил қўшинларига қарши жанг олиб бораётганини, чегара ҳудудларида “шиддатли тўқнашувлар” бўлаётганини маълум қилди. Исроил ҳудудига ҳам ракета ҳужумлари уюштирилган.
Исроил ОАВлари “Ҳизбуллоҳ” томонидан 40 дан ортиқ ракета учирилганини, сўнгги тўқнашувларда камида 10 нафар исроиллик аскар ҳалок бўлгани эълон қилди.
Бундан ташқари, БМТнинг UNIFIL миссиясига мансуб 3 нафар тинчликпарвар ҳам Ливан жанубида ҳалок бўлган. Умумий ҳисобда мамлакатда 1 200 дан ортиқ одам ҳалок бўлган, 1 миллиондан ортиқ киши кўчишга мажбур бўлган.
Исроил бош вазири Бинямин Нетаняҳу жанубий Ливандаги ҳарбий амалиётни кенгайтиришни буюрган.
