“Менинг боғим” дастури доирасида ҳар бир лойиҳага 400 миллион сўмдан ортиқ маблағ ажратилади
Шавкат Мирзиёев “Яшил макон” умуммиллий лойиҳаси доирасида кўчат экиш тадбирида иштирок этди.
Ўзбекистонда 2030 йилга қадар умумий яшиллик даражаси 30 фоизга, жон бошига тўғри келадиган яшил ҳудудлар 10 квадрат метрга етказилади. Бу ҳақда Президент матбуот котиби хабар берди.
Маълум қилинишича, яшиллик даражасини ошириш учун Сурхондарёда 10 минг гектарда “яшил макон”, Сирдарёда 84 километрли “яшил девор” барпо этилади. Қорақалпоғистонда 1 миллион гектар, Навоий ва Бухорода 300 минг гектардан, Хоразмда 85 минг гектар чўл ҳудудида янги ўрмонзорлар яратилади.
Шунингдек, вилоят ҳокимларининг ҳар бири камида 100 гектар майдонда ботаника ва дендрология боғлари, 20 тадан соя-салқин сайр кўчалари ташкил қилишга масъул бўлади.
Жорий йилдан ҳар бир ҳудудда “яшил” техникумларнинг фаолияти йўлга қўйилиб, дуал таълим асосида йилига 10 минг нафар мутахассис тайёрлаш бошланади.
Ботаника ва дендрология боғлари ушбу техникум ўқувчилари учун амалиёт базасига, илмий ходимлари учун эса тадқиқот майдонига айланади.
Бундан ташқари Президент ҳудудларда яшил боғлар яратиш бўйича аҳоли ва депутатлар иштирокини янада кенгайтиришни таклиф қилди.
“Менинг боғим” дастури доирасида ҳар бир лойиҳага бюджетдан 250 миллион сўмгача маблағ берилган бўлса, энди бу миқдор 400 миллион сўмдан оширилади.
Ҳар бир яшил боғ ва жамоат парки учун аҳоли ўзи танлаган, яшаш ҳудудларига яқин, энг муҳими, сув таъминоти мавжуд жойлардан 1 гектаргача ер ажратилади.
Бу йилги мавсумдан Қонунчилик палатасининг ҳар бир депутатига ҳам ўз округида яшил ҳудуд, яшил боғ яратиши учун 412 миллион сўмдан маблағ берилади.
