Россия ҳарбий самолёти ҳалокатга учраши оқибатида 29 киши ҳалок бўлди
Ан-26 енгил ҳарбий-транспорт самолёти бўлиб, ўртача масофаларга қўшин ва техникани ташиш учун мўлжалланган.
Аннексия қилинган Қрим ҳудудида Россиянинг Ан-26 русумли ҳарбий-транспорт самолёти ҳалокатга учради. Бу ҳақда Россия Мудофаа вазирлигига таяниб DW маълум қилди.
Қайд этилишича, режалаштирилган парвозни амалга ошираётган самолёт билан алоқа 31 март куни соат 18:00 атрофида узилган. Кейинчалик у қояга урилиб қулагани аниқланган.
Ҳалокат оқибатида бортдаги 6 нафар экипаж аъзоси ва 23 нафар йўловчи — жами 29 киши ҳалок бўлган.
Вазирликка кўра, самолётга ташқи зарба берилгани аниқланмаган. Дастлабки тахминларга кўра, фожиа техник носозлик сабаб юз берган.
Маълумот учун, Ан-26 енгил ҳарбий-транспорт самолёти бўлиб, ўрта масофаларга қўшин ва техникани ташиш учун мўлжалланган. Ушбу турдаги самолётлар билан боғлиқ ҳалокатлар Россияда аввал ҳам кузатилган. Хусусан, 2021 йил июль ойида Камчаткада содир бўлган авиаҳалокатда бортдаги 28 кишининг барчаси ҳалок бўлган эди.
