Россия Украинанинг Луганск вилояти устидан тўлиқ назорат ўрнатганини маълум қилди.

Россия Мудофаа вазирлиги чоршанба куни мамлакат қўшинлари Украинанинг шарқидаги Луганск вилояти устидан тўлиқ назорат ўрнатганини маълум қилди. Бу ҳақда The Moscow Times хабар берди.

 

Вазирлик баёнотида ҳудуднинг эгалланиши “озод этиш” сифатида таърифланиб, Ғарбий ҳарбий бўлинмалар “Луганск Халқ Республикаси” деб эълон қилинган ҳудуднинг тўлиқ қисмини қўлга киритгани билдирилди.

 

Қайд этилишича, Россия аввал ҳам 2022 йил ва 2025 йил июль ойларида Луганск устидан тўлиқ назорат ўрнатганини даъво қилган.

 

Мустақил таҳлилчиларга кўра, Россия кучлари 2022 йил ёзидан буён вилоятнинг деярли барча — 26,7 минг квадрат километр ҳудудини эгаллашга эришмоқда.

 

Мазкур баёнот Россия қўшинлари ёзда янги ҳужум бошлашга ҳозирланаётгани ҳақидаги хабарлар фонида янгради. Шу билан бирга, Москва уруш яна бир неча йил давом этиши мумкинлигига тайёргарлик кўраётгани айтилмоқда.

 

Кремль матбуот котиби Дмитрий Песков Украина президенти Володимир Зеленскийни қўшинларни қўшни Донетск вилоятидан олиб чиқишга чақирди. Песков бу қарор кўплаб инсонлар ҳаётини сақлаб қолиши ва урушнинг фаол босқичини тўхтатиши мумкинлигини қайд этган.

 

Зеленский эса АҚШ воситачилари орқали Кремль томонидан ультиматум қўйилганини билдириб, унда Украина қўшинларини икки ой ичида бутун Донбас ҳудудидан олиб чиқиш талаб этилганини маълум қилди. Акс ҳолда, Россия тинчлик музокараларида қўшимча ён беришлар талаб қилиши мумкинлиги қайд этилган.