“Ташаббусли бюджет”да 47 та лойиҳа қўшимча ғолиб деб топилди
Мазкур лойиҳалар учун маҳаллий бюджетнинг қўшимча маблағларидан жами 18,2 млрд сўм ажратилди.
Жорий йилги “Ташаббусли бюджет”нинг 1-мавсуми якунларига кўра, ғолиб бўлмаган 47 та лойиҳа қўшимча маблағ билан таъминланди. Бу ҳақда Иқтисодиёт ва молия вазирлиги матбуот хизмати хабар берди.
Маълум қилинишича, Халқ депутатлари туман ва шаҳар Кенгашлари томонидан ғолиб бўлмаган навбатдаги лойиҳаларни молиялаштириш мақсадида маҳаллий бюджетнинг қўшимча маблағларидан жами 18,2 млрд сўм ажратилиб, ушбу 47 лойиҳа қўшимча равишда ғолиб деб эълон қилинди.
Амалдаги тартибга мувофиқ, туман ва шаҳар Кенгашларига маҳаллий бюджет маблағлари ҳисобидан қўшимча ғолиб лойиҳаларни эълон қилиш ваколати берилган.
Ғолиб лойиҳалар рўйхати билан ҳавола орқали танишиш мумкин.
Ўзбекистонда Ташаббусли бюджетнинг 2026 йил биринчи мавсуми доирасида ўтказилган овоз бериш натижаларига кўра, 1996 та лойиҳа ғолиб деб топилган. Уларни амалга ошириш учун 3 триллион 5 миллиард 827 миллион сўмдан ортиқ маблағ ажратилиши режалаштирилган.
