Тошкент ва Сирдарёда “Умра” зиёрати билан боғлиқ фирибгарлик ҳолатлари фош этилди
Мазкур ҳолатлар юзасидан жиноят иши қўзғатилган.
Тошкент шаҳри ва Сирдарё вилоятида “Умра” зиёратига юбориш билан боғлиқ бир нечта фирибгарлик ҳолатлари аниқланди. Бу ҳақда Бош прокуратура ҳузуридаги Департамент хабар берди.
Маълум қилинишича, Яккасарой туманида ўтказилган тезкор тадбирда фуқаро Р.Р. бошқа бир фуқарога танишлари орқали виза расмийлаштириб бериш ва “Умра”га юборишни ваъда қилиб, 1 650 доллар олаётган вақтида ашёвий далиллар билан ушланган.
Шунга ўхшаш ҳолат Учтепа туманида ҳам қайд этилиб, фуқаро А.Р. фуқаро М.Х.ни ишонтириб, виза тайёрлаб бериш эвазига 1 500 доллар олаётганида қўлга олинган.
Сергели туманида эса фуқаро М.М. ва бошқалар фуқарони Саудия Арабистонига виза тайёрлаб, “Умра зиёрати”га юбориш учун 1 250 доллар олаётган вақтида ушланган.
Сирдарё вилоятининг Гулистон туманида аниқланган ҳолатда эса илгари фирибгарлик учун судланган фуқаро Д.Б. “Умра”га юбориш ваъдаси билан 1 000 доллар талаб қилиб, маблағнинг 900 доллари ва 1,2 миллион сўмини олаётган вақтида қўлга олинган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
