Тошкентда суд қароридан норози эркак дарахтга чиқиб олди

 

Тошкентда суд қарорларидан норози фуқаро Олий суд биноси ёнидаги дарахтга чиқиб олди. Ҳолат юзасидан Олий суд расмий муносабат билдирди.

 

Маълум қилинишича, жорий йил 30 март куни 1979 йилда Тошкент вилоятида туғилган фуқаро A.Ч. Олий суд биноси яқинидаги дарахтга чиқиб, ўзига нисбатан чиқарилган суд қарорларидан норозилигини билдирган.

 

Тегишли хизматлар томонидан фуқаро пастга туширилган ва унинг жисмоний ҳолати текширилган. Текширув натижасида унга ҳеч қандай шикаст етмагани аниқланган. Шундан сўнг у Олий суд раиси Бахтиёр Исломов томонидан қабул қилиниб, мурожаати белгиланган тартибда ўрганиш учун расмийлаштирилган.

 

Маълумотларга кўра, Жиноят ишлари бўйича Чилонзор туман судининг 2020 йил 5 октябрдаги ҳукмига биноан A.Ч. Жиноят кодексининг 184-моддаси 3-қисми билан оқланган. Шу билан бирга, Жиноят кодексининг 167-моддаси 3-қисми «а» банди билан айбли деб топилиб, 7 йил муддатга озодликдан маҳрум қилиш жазоси тайинланган.

 

Биринчи инстанция суди ҳукми кейинчалик юқори инстанция судлари томонидан ҳам кўриб чиқилиб, ўзгаришсиз қолдирилган.

 

Шунингдек, 2025 йил 29 ноябрь куни фуқаро Олий суд раиси қабулида бўлган ва унга нисбатан чиқарилган суд қарорларини ўзгартириш учун етарли асослар мавжуд эмаслиги маълум қилинган.

 

Олий суд баёнотида фуқароларнинг суд ҳимоясидан фойдаланиш ҳуқуқи қонун билан кафолатлангани, шунингдек Олий судга мурожаат қилиш учун қонун ҳужжатларида белгиланган процессуал тартиблар мавжудлиги таъкидланган.

 

Суд вакилларига кўра, мурожаат қилиш жараёнида бундай ноодатий ёки хавфли ҳаракатларга қўл уриш зарур эмас. Фуқароларга ўз ҳуқуқларини қонуний механизмлар орқали ҳимоя қилиш ва белгиланган тартибда мурожаат қилиш тавсия этилган.