Тошкентда Қурилиш вазирлиги бош мутахассиси пора билан ушланди
У Юнусободдаги уйларни бошқа бошқарув компаниясига ўтказиб бериш эвазига 2200 доллар талаб қилган.
Тошкент шаҳрида Қурилиш ва уй-жой коммунал хўжалиги вазирлиги бош мутахассиси пора билан қўлга олинди. Бу ҳақда ДХХ хабар берди.
Маълум бўлишича, бош мутахассис Юнусобод туманидаги 6 та кўп қаватли уйга хизмат кўрсатишни бир МЧЖдан иккинчи МЧЖга ўтказиш бўйича уй-жой мулкдорлари имзолаган далолатномаларни “Менинг уйим” платформасида рўйхатдан ўтказиб бериш эвазига 2200 доллар талаб қилган. У бу ишларни ўзининг мансабдор танишлари орқали ҳал қилишни режалаштирган.
Тезкор тадбирда мутахассис МЧЖ раҳбаридан 1500 доллар олган пайтда қўлга олинган. Қўлга олиш жараёнида у қочишга уринган бўлса-да, тезкор ходимлар томонидан ушлаб қолинган.
Ҳозирда унга нисбатан жиноят иши қўзғатилган ва тергов ҳаракатлари олиб борилмоқда.
