Ўзбекистонда интернетсиз мобил алоқа тариф режалари жорий этилиши мумкин
Мобил алоқа операторлари томонидан интернет трафигисиз тариф режаларини таклиф этиш мажбурий бўлиши мумкин.
Ўзбекистон Республикаси Адлия вазирлиги ташаббуси билан мобил алоқа хизматларида янги ўзгаришлар кўзда тутилмоқда. Вазирлик томонидан аҳолининг турли қатламлари эҳтиёжларини ҳисобга олган ҳолда тариф режаларини такомиллаштиришга қаратилган Ҳукумат қарори лойиҳаси ишлаб чиқилди.
Ҳужжатга кўра, мобил алоқа операторлари томонидан интернет трафигисиз — фақат қўнғироқлар ва СМС-хабарлардан иборат тариф режаларини таклиф этиш мажбурий бўлиши мумкин.
Қайд этилишича, айни пайтда бозорда бундай тариф режаларининг мавжуд эмаслиги айрим фуқаролар учун қўшимча харажатларни келтириб чиқармоқда. Хусусан, интернетдан фойдаланмайдиган кекса ёшдагилар мажбурий тарзда интернет пакети мавжуд тарифларга уланишга мажбур бўлмоқда.
Шунингдек, айрим ота-оналар вояга етмаган фарзандларини зарарли ахборотлардан ҳимоя қилиш мақсадида интернетсиз тарифларни афзал кўрса-да, ҳозирча бундай танлов имконияти чекланган.
Мазкур қарор лойиҳаси манфаатдор вазирлик ва идоралар билан келишилган.
Ҳужжат 31 март куни жамоатчилик муҳокамаси учун эълон қилинган.
