Ўзбекистонда поездлар кечикса, йўловчиларга компенсация тўланади

Рақобат қўмитаси томонидан юборилган сўров асосида маҳаллий йўналишларда (оддий ва тез юрар) поездлар кечикса, йўловчиларга пуллик компенсация тўлаш тартиби белгиланмоқда.

 

Маълум қилинишича, сўнгги йилларда Қўмитага ва ижтимоий тармоқларга йўловчилар томонидан поездлар белгиланган жадвалдан кеч келиши, манзилга кеч етиб бориши ҳақида 2025 йилда ушбу масала бўйича Рақобат қўмитасига 51 та мурожаат шикоятлар келиб тушган. 

 

Хусусан, Тошкент–Бухоро–Тошкент йўналиши бўйича ҳаракатланувчи “Шарқ” поездлари доимий равишда 40 дақиқадан 1 соатгача кечикиб келаётгани таъкидланган. Йўловчилар чипталарида ҳам поезд келиши ҳақидаги тўғри маълумот кўрсатилмагани қайд этилган.

 

Қонунчиликда эса маҳаллий йўналишларда поезд кечикса, йўловчиларга компенсация тўлаш тартиби белгиланмагани аниқланди.

 

 “Истеъмолчиларнинг ҳуқуқларини ҳимоя қилиш тўғрисида”ги қонунга кўра, истеъмолчилар товар ва хизматларни эркин танлаш, сифатли бўлишини талаб қилиш ҳамда моддий ва маънавий зарарнинг қопланишини талаб қилиш ҳуқуқига эга.

 

Шу муносабат билан Рақобат қўмитаси Транспорт вазирлигига сўров юбориб, йўловчилар ҳуқуқларини таъминлаш мақсадида янги қоидалар жорий этилишини талаб қилган. 

 

Вазирлик ҳозирда “Ўзбекистон Республикаси темир йўл транспортида йўловчилар, багаж ва юк багаж ташиш қоидалари”нинг янги таҳрири ишлаб чиқилаётганини маълум қилган.

 

Янги тартибга кўра, маҳаллий йўналишларда поезд кечикса, йўловчиларга қуйидагича компенсация тўланади:

 

• 15–30 дақиқа кечикса – йўлкира қийматининг 15%;

 

• 31–60 дақиқа кечикса – йўлкира қийматининг 25%;

 

• 61–120 дақиқа кечикса – йўлкира қийматининг 50%;

 

• 121 дақиқадан кўп кечикса – йўлкира қийматининг 100%;

 

Маълумот ўрнида, ҳозирда ушбу тартиб фақат “Афросиёб” поездлари учун мавжуд эди, янги қоидалар асосида эса мазкур тартибнинг барча маҳаллий йўналишларда қўлланилиши режалаштирилмоқда.