Жиззахда жамоат транспортида 1 апрелдан тўлов учун нақд пул қабул қилинмайди

Жиззах шаҳрида жамоат транспортида йўлкира ҳақини тўлашда нақд пулдан воз кечиб, тўлиқ электрон тўлов тизимини жорий этиш режалаштирилмоқда. Бу ҳақда маҳаллий ҳокимлик қарори қабул қилинди.

 

Қарорга кўра, шаҳарда жамоат транспорти хизматлари сифатини ошириш, тўловлар шаффофлигини таъминлаш ва соҳада рақамли технологияларни кенг жорий этиш мақсад қилинган. Шунингдек, ушбу чоралар орқали яширин иқтисодиётни қисқартириш ва электрон тўлов тизимларидан фойдаланишни рағбатлантириш кўзда тутилган.

 

Маълум қилинишича, амалдаги тарифларга мувофиқ, Жиззах шаҳрида автобусларда йўлкира ҳақи бир йўловчи учун 3000 сўм этиб белгиланган. Электрон тўлов тизими — АТТО орқали тўлов амалга оширилганда эса рағбатлантирувчи чегирма қўлланилиб, йўлкира 2100 сўмни ташкил этади.

 

Қарорга асосан, 2026 йил 1 апрелдан бошлаб шаҳар автобусларида йўл ҳақини нақд пулда қабул қилиш амалиёти тўлиқ бекор қилинади. Йўловчилардан тўловлар фақат электрон шаклда қабул қилинади.

 

Шу мақсадда, Жиззах шаҳрида автобус бекатларига ўз-ўзига хизмат кўрсатувчи инфокиосклар ўрнатилиши режалаштирилган. Мазкур қурилмалар орқали йўловчилар электрон чипталарни харид қилиш имкониятига эга бўлади. Инфокиосклар ўрнатилиши лозим бўлган жойлар рўйхати тегишли идоралар томонидан шакллантирилади.

 

Бундан ташқари, шаҳардаги барча автобуслар махсус валидаторлар билан жиҳозланиб, йўл ҳақини автоматлаштирилган АТТО тизими орқали тўлаш доимий назоратга олинади.