Давлат тиббиёт муассасалари 5 кунлик иш ҳафтасига ўтказилди
Тиббиёт ходимлари учун ҳафталик иш вақти 36 соатдан ошмайди.
Ўзбекистонда давлат тиббиёт муассасалари иш вақти режими 1 апрелдан 5 кунлик иш ҳафтасига ўтказилади. Бу ҳақда президентнинг 2025 йил 9 ноябрдаги “Тиббиёт ва фармацевтика ходимларини қўллаб-қувватлаш чоралари тўғрисида”ги қарорида белгиланган.
Маълум қилинишича, янги режимда шифохоналар фаолиятининг узлуксизлигини таъминлаш мақсадида байрам ва дам олиш кунлари навбатчилик асосида ишлаш йўлга қўйилади.
Соғлиқни сақлаш вазирлигининг буйруғи билан давлат тиббиёт муассасаларида беш кунлик иш ҳафтасини ташкил этишнинг вақтинчалик тартиби тасдиқланган.
1 апрелдан қўлланиладиган асосий қоидалар:
• тиббиёт ходимлари учун ҳафталик иш вақти 36 соатдан ошмайди;
• зарарли ва хавфли шартларда ишловчилар учун қисқартирилган иш вақти қўлланилади;
• юқори руҳий ва ақлий зўриқишли ишлар ҳам 36 соатдан ошмайди;
• тиббиёт ходими бўлмаганлар учун иш вақти 40 соатни ташкил этади.
Поликлиника ва оилавий шифокорлик пунктларида иш вақти:
• душанба–жума: 08:00–20:00;
• шанба: 08:00–14:00 (навбатчилик асосида).
Соғлиқни сақлашнинг янги модели жорий этилган ҳудудларда:
• асосий иш вақти: 08:00–16:00;
• қўшимча навбатчилик: 16:00–20:00.
Навбатчилик Соғлиқни сақлаш вазирлигининг 254-сон буйруғи асосида ташкил этилади. Бунда иш ҳақи сақланиб, камайтирилмайди. Ички ҳужжатлар ва меҳнат шартномалари қайта расмийлаштирилади.
