Энди жарима автомобиль эгасига эмас, қоидабузар ҳайдовчига расмийлаштирилади
my.gov.uz порталида жарималарни бошқа ҳайдовчига расмийлаштириш хизмати ишга тушди.
Ягона интерактив давлат хизматлари портали — my.gov.uz орқали транспорт воситасини бошқариш ҳуқуқини бошқа шахсга расмий тарзда топшириш имконияти яратилди. Бу ҳақда портал ахборот хизмати маълум қилди.
Янги хизматга кўра, агар автомобиль ишончнома ёки яқин қариндошлик асосида бошқа шахс томонидан бошқарилаётган бўлса ва у йўл ҳаракати қоидаларини бузса, жарима транспорт воситаси эгасига эмас, балки қоидабузарликни содир этган ҳайдовчининг номига расмийлаштирилади.
Бунинг учун автомобиль эгаси my.gov.uz порталидаги “Синов тартибида” бўлими орқали ариза юбориши керак. Аризада транспорт воситасининг давлат рақами, бошқариш муддати ҳамда ҳайдовчининг ЖШШИР ва паспорт маълумотлари кўрсатилади. Агар бош ишончнома мавжуд бўлса, у ҳам аризага илова қилинади.
Шундан сўнг ҳайдовчи порталидаги «Хабарномалар» бўлими орқали аризани электрон рақамли имзо, Мобиле-ИД ёки Фасе-ИД ёрдамида тасдиқлаши лозим.
Мазкур хизмат пулли бўлиб, унинг қиймати БҲМнинг 0,9 фоизини ташкил этади. 10 фоизлик чегирма ҳисобга олинган ҳолда хизмат нархи 37 080 сўм этиб белгиланган. Ижтимоий реестрга киритилган шахслар ҳамда I ва II гуруҳ ногиронлиги бўлган фуқаролар учун эса 50 фоизлик чегирма амал қилади.
Аризалар жисмоний шахслар учун автоматик тарзда кўриб чиқилади (бош ишончнома мавжуд бўлса — 5 кун ичида), юридик шахслар учун эса 5 иш куни ичида кўриб чиқилиши белгиланган.
Шунингдек, янги тартибга мувофиқ, давлат органлари ҳамда йўловчи ташиш фаолияти билан шуғулланувчи ташкилотлар ходимлари учун жаримани расмийлаштириш бепул амалга оширилади.
