Эрон АҚШ ва Исроил таслим бўлмагунча урушни давом эттиришини маълум қилди

 

Эрон Қуролли Кучлари “Хатам ал-Анбия” марказий қўмондонлиги вакили Иброҳим Зулфағарий мамлакат АҚШ ва Исроил таслим бўлишини эълон қилмагунча ҳарбий ҳаракатларни давом эттиришини билдириб ўтди. Бу ҳақда Меҳр ахборот агентлиги хабар берди.

 

Унинг таъкидлашича, ҳарбий кампания белгиланган стратегик мақсадларга эришилгунга қадар давом этади. Мазкур баёнот минтақада кескинлик кучайиб бораётган бир пайтда янгради.

 

Аввалроқ АҚШ президенти Доналд Трамп Эрон ҳудудига қарши кенг кўламли ҳарбий операция тайёрланаётганини маълум қилган эди. Унинг айтишича, операция яқин ҳафталарда амалга оширилиши мумкин.

 

Маълумот ўрнида, ҳарбий ҳаракатлар февраль ойининг охирида АҚШ ва Исроилнинг Эронга қарши операцияси билан бошланган. Бунга жавобан Теҳрон Исроил ҳудуди, АҚШ ҳарбий иншоотлари ҳамда Яқин Шарқдаги энергетика инфратузилмасига ракета ва дрон зарбалари берган.

 

Шунингдек, Эрон глобал нефть ташишининг муҳим йўлларидан бири ҳисобланган Ҳормуз бўғозини ёпганини эълон қилган.

 

Вазият кескинлашиб бораётган бир пайтда Россия расмийлари можарони тезроқ тўхтатиш зарурлигини таъкидлаб чиқди. Аввалроқ эса Бирлашган Араб Амирликларидаги АҚШ ҳарбий объектларига ҳам зарбалар берилгани ҳақида хабарлар тарқалган эди.