Эрон можарони тугатиш учун воситачилар орқали шартларини тақдим этди

 

Эрон АҚШ ва Исроил билан юзага келган можарони тинч йўл билан ҳал қилиш учун ўз шартларини воситачилар орқали етказди. Бу ҳақда Эроннинг Қоҳирадаги элчиси Можтаба Фердовсипур РИА Новости агентлигига берган интервьюсида маълум қилди.

 

Дипломатнинг таъкидлашича, Теҳрон урушни тугатиш учун бир қатор талабларни илгари сурган. Унга кўра, Эрон компенсация тўланиши, барча санкцияларнинг бекор қилиниши ҳамда мамлакатга нисбатан тажовуз қайта такрорланмаслиги бўйича аниқ кафолатлар берилишини талаб қилмоқда.

 

Шу билан бирга, элчи ҳозирча воситачилар томонидан олиб борилаётган саъй-ҳаракатлар аниқ натижа бермаганини қайд этган. Туркия, Покистон, Миср ва Саудия Арабистони минтақада тинчлик ўрнатишга уриниш қилаётган бўлсада, томонлар ҳозирча умумий келишувга эриша олмаган.

 

Reuters агентлигининг ўз манбаларига таяниб хабар беришича, Тел-Авив ва Вашингтон Покистон томонидан илгари сурилган вақтинчалик сулҳ таклифига ҳам жавоб бермаган.

 

Бундан аввал Эроннинг Россиядаги элчиси Казем Жалолий Россия ташқи ишлар вазири ўринбосари Георгий Борисенко билан учрашувда Москванинг можарони ҳал этиш борасидаги саъй-ҳаракатлари ҳамда Ислом Республикасига кўрсатилган гуманитар ёрдам учун миннатдорчилик билдирган.

 

Шу билан бирга, АҚШ президенти Доналд Трамп Вашингтон Эрон раҳбарияти билан музокаралар олиб бораётганини маълум қилган. Бироқ Эрон Ташқи ишлар вазирлиги бундай алоқаларни рад этиб, Теҳронга фақат воситачилар орқали “қабул қилиб бўлмайдиган шартлар” етказилаётганини билдирган.