Эронда АҚШ ва Исроил зарбалари натижасида дунёдаги энг мураккаб муҳандислик иншоотларидан бири вайрон бўлди
Ушбу иншоот мамлакатдаги йирик инфратузилма лойиҳаларидан бири бўлиб, муҳандислик нуқтаи назаридан мураккаб конструкция сифатида баҳоланган.
АҚШ ва Исроил томонидан Эрон ҳудудига уюштирилган ҳаво зарбалари оқибатида мамлакатдаги энг мураккаб муҳандислик иншоотларидан бири ҳисобланган «Б1» кўприги вайрон бўлди. Бу ҳақда Алборз вилояти расмийларига таяниб Tasnim хабар берди.
Маълумотларга кўра, зарба Караж шаҳрида жойлашган кўприкка берилган. Ушбу иншоот мамлакатдаги йирик инфратузилма лойиҳаларидан бири бўлиб, муҳандислик нуқтаи назаридан мураккаб конструкция сифатида баҳоланган.
Вилоят маъмурияти баёнотига кўра, ҳужум оқибатида айрим ҳудудларда электр таъминотида узилишлар кузатилган. Расмийлар аҳолини воқеа содир бўлган ҳудуддан узоқроқ туришга ва хавфсизлик чораларига риоя қилишга чақирди.
Маҳаллий манбаларнинг билдиришича, зарбалар икки босқичда амалга оширилган. Иккинчи ҳужум қутқарув хизматлари биринчи зарба оқибатларини бартараф этиш билан банд бўлган пайтда содир бўлган.
Аввалроқ АҚШ президенти Доналд Трамп Эрон ҳудудига нисбатан кучли зарбалар берилиши мумкинлиги ҳақида баёнот қилган эди.
