Индонезияда 7,6 магнитудали зилзила содир бўлди
Ҳодиса оқибатида бир киши ҳалок бўлди, айрим ҳудудларда электр таъминоти узилди.
Пайшанба куни Индонезиянинг Шимолий Малуку денгизида 7,6 магнитудали зилзила содир бўлди. Бу ҳақда Reuters расмийларга таяниб хабар бермоқда.
Маълум қилинишича, ҳодиса оқибатида бир киши ҳалок бўлди, биноларга зарар етди ва цунами тўлқинлари қайд этилди. Шу билан бирга, кейинчалик цунами бўйича огоҳлантирувлар бекор қилинди.
Индонезиянинг БМКГ метеорология агентлиги бешта ҳудудда цунами тўлқинлари кузатилганини билдирди. Энг баланд тўлқин Шимолий Сулавесидаги Минаҳаса ҳудудида 0,75 метрга етган. Шунингдек, қарийб 50 та афтершок қайд этилиб, улардан энг кучлиси 5,8 магнитудада бўлган.
Агентлик раҳбари Теуку Фаяал Фатҳани дастлаб 0,5 метрдан 3 метргача бўлган тўлқинлар юзага келиши мумкинлигини билдирган, бироқ кейинчалик огоҳлантириш бекор қилинган. АҚШнинг цунами кузатув хизматлари ҳам Индонезия, Филиппин ва Малайзия қирғоқларида хавф эҳтимоли борлигини маълум қилган, аммо кейинчалик бу таҳдидни рад этган.
Шимолий Сулавеси полиция бошлиғи ўринбосари Ави Сетиёнонинг айтишича, Манадо шаҳрида спорт идорасига қарашли бино қисман қулаб тушиши оқибатида бир киши ҳалок бўлган.
Индонезия миллий табиий офатлар агентлиги фуқароларни ҳушёрликка чақирди. Баёнотда афтершоклар эҳтимоли сақланиб қолаётгани сабаб эҳтиёт чораларига риоя қилиш зарурлиги таъкидланган.
Дастлабки маълумотларга кўра, бир нечта уй ва черковларга енгил ва ўртача даражада зарар етган.
US Geological Survey маълумотига кўра, зилзила эпицентри Филиппин қирғоқларидан тахминан 580 км, Малайзиянинг Сабаҳ штатидан эса 1000 км узоқликда, 35 км чуқурликда жойлашган. Сўнгги 50 йил ичида ушбу ҳудуд яқинида 7 магнитудадан юқори яна тўққизта зилзила кузатилган, бироқ улар катта талафотларга олиб келмаган.
Мутахассислар эпицентр аҳоли зич жойлашган ҳудудларга нисбатан яқин бўлса-да, қўшимча қурбонлар эҳтимоли пастлигини ва иқтисодий зарар кўп бўлмаслигини тахмин қилмоқда.
Агентлик вакили Абдул Муҳари аҳолига шикаст етган бинолардан узоқроқ туришни тавсия қилди. Гувоҳларнинг айтишича, одамлар ваҳима ичида уйларини тарк этган, айрим ҳудудларда электр таъминоти узилган.
