Нефт нархлари кескин ошди

АҚШ президенти Доналд Трaмп Эрон бўйича ҳарбий ҳужумлар давом этишини маълум қилганидан сўнг, жаҳонда нефт нархлари кескин ошди. Бу ҳақда Reuters ёзмоқда.

 

Пайшанба куни савдоларда Brent маркали нефт фьючерслари 7,65 долларга, яъни 7,6 фоизга қимматлаб, бир баррел учун 108,81 долларга етди. West Texas Intermediate (WTI) нефти эса 7,06 долларга, яъни 7,1 фоизга ошиб, 107,18 долларни ташкил этди.

 

Ҳар икки эталон кўрсаткич ҳам сўнгги уч ҳафта ичидаги энг катта кунлик ўсишни қайд этмоқда. Шунга қарамай, нархлар можаронинг аввалги босқичида кузатилган 119 доллардан юқори даражалардан пастлигича қолмоқда.

 

Нархларнинг кескин кўтарилиши Трампнинг халқига йўллаган нутқидан кейин юз берди. У яқин ҳафталарда Эрон бўйича ҳарбий босим кучайтирилишини билдириб, аниқ дипломатик ташаббуслар ҳақида маълумот бермади.

 

Бозор таҳлилчилари бу ҳолатни кескинликнинг давом этиши ва таъминот занжирларида узилишлар эҳтимоли билан изоҳламоқда. Хусусан, Phillip Nova компанияси таҳлилчиси Приянка Сачдева нутқда оташкесим ёки музокаралар бўйича аниқ сигнал бўлмаганини таъкидлади.

 

Хусусан, можаро фонида денгиз транспорти хавфсизлигига таҳдидлар ҳам ортмоқда. Қатар Мудофаа вазирлиги маълумотига кўра, QatarEnergy томонидан ижарага олинган нефть танкери Қатар сувларида Эрон ракетаси зарбасига учраган.

 

Айрим бозор иштирокчилари Ҳўрмуз бўғози ҳудудидаги портлардан фойдаланиш чеклангани сабаб Яқин Шарқ нефтига оид айрим савдоларни тўхтатганини билдирган. Мазкур йўлак орқали глобал нефть таъминотининг 20 фоизи ўтади.

 

Халқаро энергия агентлиги эса таъминотдаги узилишлар апрель ойидан бошлаб Европа иқтисодиётига таъсир кўрсатиши мумкинлигидан огоҳлантирди.

 

Rystad таҳлил компаниясига кўра, бозорлар учун кейинги асосий омил Эрон ва халқаро ҳамжамиятнинг жавоби бўлади. Ҳозирча Ҳўрмуз бўғозида хавфсизликни таъминлаш бўйича аниқ чоралар кузатилмаяпти.