Рақобат қўмитаси мобил қурилмаларни IMEI рўйхатидан ўтказмасдан сотаётган тадбиркорларни огоҳлантирди
Фуқаролардан мобил қурилмалар IMEI кодлари тизимда рўйхатдан ўтказилмасдан сотилаётгани ҳақида мурожаатлар келиб тушган.
Ўзбекистон Рақобат қўмитаси мобил қурилмаларнинг IMEI кодлари рўйхатдан ўтмаган ҳолда сотилиши ва хариддан сўнг қайта рўйхатдан ўтказиш зарурати туғилаётгани муносабати билан огоҳлантириш берди.
Маълум қилинишича, мазкур масала бўйича истеъмолчилар томонидан Рақобат қўмитаси ва қўмитанинг ҳудудий бошқармаларига 2025 йил давомида 147 та мурожаат келиб тушган бўлиб, мазкур мурожаатларнинг 55 таси ижобий ҳал қилинган, 89 тасига ҳуқуқий тушунтириш берилган. Қолган 3 таси тегишлилиги бўйича ваколатли органларга юборилган.
Ўрганиш натижаларига кўра, Ўзбекистон Республикаси “Истеъмолчиларнинг ҳуқуқларини ҳимоя қилиш тўғрисида”ги қонунининг 6-моддасига асосан, ишлаб чиқарувчи (ижрочи, сотувчи) истеъмолчига ўзи реализация қилаётган товар (иш, хизмат)лар ҳақида ўз вақтида зарур, тўғри ва тушунарли маълумот бериши шарт.
Бундан ташқари мазкур қонунинг 11-моддасида ишлаб чиқарувчи (ижрочи) кафолат муддати мобайнида товар (хизмат)нинг, шу жумладан, бутловчи буюмларнинг нормал ишлашини (қўлланилишини, улардан фойдаланилишини) таъминлаши шартлиги белгиланган.
Вазирлар Маҳкамасининг 778-сон қарори билан тасдиқланган Низомга кўра, мобил қурилмаларни рўйхатдан ўтказиш учун тадбиркорлик субъектлари жавобгар ҳисобланади. Барча IMEI кодларини рўйхатдан ўтказиш мажбурияти ишлаб чиқарувчи, импорт қилувчи ёки сотувчи зиммасига юкланади.
Истеъмолчиларнинг ҳуқуқларини ҳимоя қилиш қонунига кўра, истеъмолчи товарни эркин танлаш ва сифатини талаб қилиш ҳуқуқига эга, сотувчи эса қўшимча хизматларни мажбуран юклай олмайди.
Шунингдек, чакана савдода рўйхатдан ўтказилган қурилмани тақдим этиш масъулияти ҳам сотувчи зиммасида бўлади.
