Ўзбекистон яшил Марказий Осиё етакчига айланиши мумкин — БМТнинг Ўрмонлар бўйича форуми раиси
Исмоил Белен Ўзбекистондаги кўкаламзорлаштириш ташаббуси ҳақида гапирди.
БМТнинг Ўрмонлар бўйича форуми раиси Исмоил Белен Ўзбекистон ҳудудининг ҳозирги кунда қарийб 10 фоизини ўрмонлар ташкил этишини айтиб, бу мамлакатни янада кўкаламзорлаштириш учун қўшимча саъй-ҳаракатлар ва инвестицияларни талаб қилишини билдирди.
Раис Белен Ўзбекистон президенти Шавкат Мирзиёев бошчилигида амалга оширилаётган “Яшил макон” умуммиллий кўкаламзорлаштириш дастурини алоҳида таъкидлаб, ташаббус яқин келажакда ўрмонлар майдонини 10 фоиздан 15 фоизгача оширишни назарда тутишини қайд этди.
“Мен Ўзбекистонга бир неча бор келганман, жумладан, Орол денгизининг қуриган тубига бориб, у ердаги кенг кўламли ўзгаришларга шахсан гувоҳ бўлганман,” — деди Белен.
У Ўзбекистонни Марказий Осиёда йирик ташаббус ва лойиҳаларни амалга оширишда етакчи сифатида баҳолади.
Беленнинг таъкидлашича, агар ушбу саъй-ҳаракатлар давом эттирилса ва инсон ҳамда табиатга йўналтирилган инвестициялар сақлаб қолинса, Ўзбекистон яшил Марказий Осиёнинг етакчисига айланиши мумкин.
