Ўзбекистонда Президент Халқ қабулхонаси ташкил этилади
Мазкур Халқ қабулхоналарида муаммолар жойида ҳал қилиниб, мурожаатлар таҳлили олиб борилади.
Ўзбекистон Республикаси Президенти ҳузурида Президент Халқ қабулхонаси ташкил этилиши тўғрисида фармон имзоланди.
Фармонга кўра, Қорақалпоғистон Республикаси Вазирлар Кенгаши Раиси ҳамда вилоятлар ва Тошкент шаҳри, туман (шаҳар) ҳокимлари тегишли Халқ қабулхонасига жамоатчилик асосида раҳбарлик қилади. Улар мунтазам равишда фуқароларни қабул қилиб, муаммоларини жойида ҳал қилиш чораларини кўради ва мурожаатлар таҳлилини олиб боради.
Вазирлик ва идоралар раҳбарлари, Қорақалпоғистон Республикаси Вазирлар Кенгаши Раиси ҳамда вилоят ва шаҳар ҳокимлари Президент ҳузурида тақдимотлар ўтказиб, аҳоли мурожаатларидаги тизимли муаммолар ва уларнинг ечимлари юзасидан алоҳида ҳисобот беради.
Шунингдек, Ўзбекистон Президенти Виртуал қабулхонаси ахборот тизимига келиб тушган мурожаатлар бўйича назорат вақти режими ўрнатилади, бунда кўриб чиқилиши белгиланган муддатдан ўтган мурожаатлар ижро учун автоматик юқори турувчи давлат органига ўтади.
Мазкур қабулхона ахборот тизимида мурожаатларни қабул қилишда улар “шошилинч”, “одатий”, “маслаҳат талаб қилувчи” тоифаларига ажратиш амалиёти йўлга қўйилади. Назоратга қайтарилган мурожаатлар 3 иш куни ичида юқори турувчи органлар томонидан қайта ўрганиб чиқилади.
Аҳоли мурожаатлари билан ишлаш бўйича давлат органлари ва ташкилотлари раҳбарлари ҳисоботларини Қонунчилик палатаси ва Сенатда, ҳокимлар ҳамда ҳудудий давлат органлари ва ташкилотлари раҳбарлари ҳисоботларини эса тегишлича Сенатда ёки маҳаллий кенгашларда ҳар чоракда камида 1 марта эшитиб бориш тартиби жорий қилинади.
Давлат органлари ва ташкилотларининг ахборот хизматлари Халқ қабулхоналари билан ҳамкорликда ҳудудда мурожаатлар билан ишлаш ҳолатини ёритади. Бундан ташқари улар оммавий ахборот воситалари ва ижтимоий тармоқлардаги мурожаатларнинг кўриб чиқилишига оид эътирозларни ўрганиб боради.
Давлат органлари ва ташкилотлар ҳамда маҳаллий ҳокимликлар томонидан ўтказиладиган шахсий ва сайёр қабуллар тўлиқ рақамлаштирилади ва қабуллар жараёни устидан назорат ўрнатилади.
Жамоавий мурожаатлар аҳоли вакиллари ҳамда “маҳалла еттилиги” иштирокида ўрганилиб, уларнинг розилиги асосида назоратга олинади.
