Андижонда МИБ орқали қидирувдаги машина топилди
Айни пайтда автомашина хатланиб, жарима майдонига жойлаштирилган.
Бугунги кунда ҳар қандай қарз гаровга асосланиши тақозо этилмоқда. Қарз олувчи шартномадаги мажбуриятини бажармаса суд ундирувни гаров мулкига қаратади.
Мажбурий ижро бюроси Андижон вилояти бошқармаси иш юритувига ҳам айнан шу мазмундаги суднинг ижро ҳужжати келиб тушган бўлиб, унда “ZIRAAT BANK UZBEKISTAN” АЖ фойдасига қарздор Н.Х.дан жами 301,8 млн. сўм кредит қарзини ундириш ҳамда ундирувни жавобгарга тегишли “EXEED LX PREMIUM” русумли автотранспорт воситасига қаратилиши кўзда кўрсатилган.
Қарздорликни ундириш мақсадида ижро ҳаракатлари давомида гаровдаги қарздорга тегишли “EXEED LX PREMIUM” автомашинасига тақиқ ўрнатилган.
Давлат ижрочиси томонидан ижро ҳужжатида кўрсатилган манзилга бир неча маротаба бориб кўздан кечирилганда, автомашина йўқлиги аниқлангач, қидирув эълон қилинган.
Бюронинг Андижон вилояти бошқармаси қидирув шуъбаси ходимлари ҳамда ИИБ ЙҲХХ билан ҳамкорликда олиб борилган тадбирлар давомида қидирувдаги автомашина Андижон шаҳридан топилди. Автомашина хатланиб, жарима майдонига олиб кирилди.
