Қибрайда кредит қарзи сабаб гаровдаги уй сотилди
Маълум бўлишича, фуқаро 302 млн кредит қарзини тўламай келган.
Фуқаролик ишлари бўйича Чирчиқ туманлараро судининг ижро варақасига асосан қарздор С.Р.дан ундирувчи “Garantbank” АЖ фойдасига 302.141.200 сўм кредит қарздорлик ундириш ва ундирувни гаров мулки ҳисобланган А.Д.га тегишли 4 хонали уйга қаратиш тўғрисидаги ижро ҳужжати Бюронинг Тошкент вилоят бошқармаси иш юритувига келиб тушган ва ижро ҳаракатларига киришилган.
Олиб борилган ижро ҳаракатлари давомида, қарздор ва гаров мулк эгаси томонидан ижро ҳужжати талаби бажарилмаганлиги сабабли, кредит қарздорликни ундириш мақсадида ижро варақасида кўрсатилган гаров мулк эгаси А.Д.га тегишли бўлган гаров мулки хатланиб, қарздорликни тўламаган тақдирда ундирув ушбу гаров мулкига қаратилиши тўғрисида огоҳлантирилган.
Шунга қарамасдан, қарздор ва гаров мулк эгаси томонидан кредит қарздорлик тўланмаганлиги сабабли, Бюронинг Тошкент вилояти бошқармаси Алоҳида муҳим ижро ишларини ижро этиш шўъбаси инспекторининг қарорига асосан ушбу гаров мулки электрон онлайн-аукцион орқали сотувга чиқарилиб, 551.250.000 сўмга сотилган ва сотувдан тушган пул маблағи ундирувчи “Garantbank” АЖ фойдасига ўтказилиб, ижро ҳужжати бўйича иш юритуви амалда тамомланган.
