“Иссиқлик электр станциялари” АЖда ёшлар билан очиқ мулоқот ўтказилди
Мулоқот давомида ёш мутахассисларнинг фаолиятини қўллаб-қувватлаш ҳамда малака ошириш масалаларига алоҳида эътибор қаратилди.
Бугун “Иссиқлик электр станциялари” АЖ Бошқаруви раиси тизимда фаолият юритаётган ёшлар билан очиқ мулоқот ўтказди.
Янги Ўзбекистонда ёшлар сиёсати давлат аҳамиятига эга бўлган энг устувор йўналишлардан бири сифатида белгиланган. Айни пайтда юртимиз аҳолисининг қарийб 60 фоизини, яъни 22 миллиондан ортиқ қисмини ёшлар ташкил этади.
Ўзбекистон Президенти ташаббуси билан 100 дан зиёд қонун ва қарорлар қабул қилиниб, кенг кўламли дастурлар амалга оширилмоқда. Мазкур ҳужжатлар таълим сифатини ошириш, ёшлар бандлигини таъминлаш, тадбиркорликни ривожлантириш, “Ёшлар дафтари” орқали ижтимоий қўллаб-қувватлаш, спорт ва соғлом турмуш тарзини тарғиб қилиш, шунингдек, инновация ва ахборот технологиялари соҳаларини ривожлантиришни қамраб олган.
Ҳозирги кунда тизимда 10 397 нафар ишчи-хизматчи юртимиз аҳолисини узлуксиз ва ишончли электр энергияси билан таъминлаш йўлида фидокорона меҳнат қилмоқда. Улардан 8 287 нафари эркаклар, 2 110 нафари аёллар бўлиб, 1 527 нафарини, яъни 14 фоизини 30 ёшгача бўлган ёшлар ташкил этади.
“Албатта, энергетика соҳаси машаққатли, бироқ айни пайтда ниҳоятда шарафли ва масъулиятли соҳадир. Шу боис, ушбу тармоқда билимли, ташаббускор ва интилувчан ёшларнинг иштирокини янада кенгайтиришни устувор вазифа сифатида белгилаганмиз. Зеро, барқарор ишлаб чиқариш жараёни, аввало, юқори малакали ва ўз касбига садоқатли кадрларга таянади”, – деди Бошқарув раиси.
Бугунги кунда тизимда 33 нафар ёш мутахассис раҳбар лавозимларида фаолият юритмоқда.
Фақат ўтган йилнинг ўзида тизим корхоналарида фаолият юритаётган 3 040 нафар ходим республикадаги турли ўқув марказларида малака оширди. Шунингдек, 112 нафар ходим станциялар ўртасида тажриба алмашиш мақсадида хизмат сафарларига юборилди.
Учрашув самимий ва конструктив руҳда ўтди. Ёшлар ўз таклиф ва ташаббусларини бевосита раҳбарга билдирдилар. Кўтарилган масалалар юзасидан тегишли масъулларга аниқ топшириқлар берилди.
“Иссиқлик электр станциялари” АЖ Матбуот хизмати
