ППХ ходимига қўл кўтарган ҳайдовчининг ИИБдаги акаси ишдан олинди

Тошкент шаҳрининг Яшнобод туманида ППХ ходимига нисбатан содир этилган ҳуқуқбузарлик билан боғлиқ ҳолат юзасидан ички ишлар органларида хизмат интизоми масаласи муҳокама қилинди.

 

Сирдарё вилояти Ички ишлар бошқармасида ўтказилган йиғилишда тизимдаги хизмат интизоми, профилактика ишлари самарадорлиги ҳамда жиноятчиликка қарши курашдаги мавжуд камчиликлар танқидий таҳлил қилинди. Йиғилиш Диёбек Саттаров раҳбарлигида ўтказилди.

 

Муҳокама давомида жамоатчилик эътиборига тушган ҳодиса — ППХ ходимига қўл кўтарган ҳайдовчининг ички ишлар тизимида ишловчи акаси воқеага аралашишга урингани алоҳида кўриб чиқилди. Ушбу ҳолат хизмат ваколатларидан нотўғри фойдаланиш эҳтимоли сифатида баҳоланди.

 

Йиғилиш якунида Сирдарё вилояти ИИБ раҳбар ходими, подполковник Шерзод Пардаев хизмат интизомини бузганлиги сабабли эгаллаб турган лавозимидан озод этилгани маълум қилинди.

 

Шунингдек, ҳуқуқбузарлик содир этган шахс процессуал тартибда ушлангани ва унга нисбатан Жиноят кодексининг ҳокимият вакилига қаршилик кўрсатиш ҳамда безориликка оид моддаларига асосан жиноят иши қўзғатилгани билдирилди.

 

Масъуллар томонидан ички ишлар органларида қонунийлик ва хизмат интизомини таъминлаш устувор вазифа экани, мансабидан қатъи назар, қоидабузарликларга йўл қўйган ходимларга нисбатан қатъий чоралар кўрилиши таъкидланди.