Россияда йўловчи поезди рельсдан чиқиб кетди
Ҳодиса оқибатида 22 киши жароҳатланган, йўловчилар деразалар орқали эвакуация қилинган.
Россиянинг Уляновск вилоятида йўловчи поезди рельсдан чиқиб кетиши оқибатида камида 22 киши жароҳат олди. Бу ҳақда DW хабар берди.
Челябинск вилояти губернатори Алексей Текслер маълум қилишича, Челябинск–Москва йўналишида ҳаракатланаётган поезднинг еттита вагони Бряндино станцияси яқинида рельсдан чиқиб кетган.
Жароҳатланганлар орасида бир нафар бола бор. Икки кишида суяк синиши аниқланган, қолган 20 нафар йўловчи турли даражадаги лат еган.
Давлат ахборот агентлиги ТАСС хабарига кўра, ҳодиса вақтида поездда жами 415 нафар йўловчи бўлган. Рельсдан чиқиш оқибатида вагонлар ён томонга ағдарилиб кетган, йўловчилар эса деразалар орқали эвакуация қилинган.
Ҳозирда ҳодиса жойида тезкор хизматлар, Фавқулодда вазиятлар вазирлиги бўлинмалари ҳамда учта тикловчи поезд иш олиб бормоқда.
