Россияда жазо ўтаётган 3 мингдан ортиқ ўзбекистонлик маҳкум ватанга қайтарилиши мумкин
Бунинг учун Ўзбекистон маҳкумларни ўз фуқаролиги бўлган давлатга топшириш бўйича халқаро конвенцияга қўшилиши лозим.
Россия ҳукумати ушбу мамлакатда жазо ўтаётган ва жазони Ўзбекистонда давом эттириш истагини билдирган 3 мингдан ортиқ ўзбекистонликни топширишга тайёрлигини билдирди. Бу ҳақда Россия инсон ҳуқуқлари бўйича вакили Татяна Москалкова маълум қилган.
Москалкованинг сўзларига кўра, мазкур жараённи амалга ошириш учун Ўзбекистон 1998 йилда қабул қилинган, маҳкумларни ўз фуқаролиги бўлган давлатга топшириш тўғрисидаги халқаро конвенцияга қўшилиши лозим. Тошкент ушбу ҳужжатни ратификация қилганидан сўнг, Россия ўзбекистонлик маҳкумларни ватанга юборишда амалий ёрдам кўрсатади.
Қайд этилишича, мазкур ҳужжат Беларус, Арманистон, Қозоғистон, Қирғизистон ва Тожикистон каби давлатлар учун юридик кучга эга. Яъни ушбу мамлакатлар фуқаролари истак билдирган тақдирда Россия ҳукумати уларни ўз юртидаги жазони ижро этиш муассасаларига ўтказиши мумкин.
Шу билан бирга, ОАВларда Россияда жазо ўтаётган маҳкумлар, жумладан хорижликлар ҳам Украинадаги урушга жалб қилинаётгани ҳақида хабарлар берилмоқда. Айрим маълумотларга кўра, бунинг учун маҳкумларга турли шартлар таклиф этилмоқда ёки босим ўтказилмоқда.
