Ўзбекистонда марокаш чигирткаси тарқалмоқда

Ўзбекистонда зарарли чигирткаларга қарши кураш тадбирлари бошланди. Бу ҳақда Ўсимликлар карантини ва ҳимояси агентлиги маълум қилди.

 

Маълумотларга кўра, Қашқадарё ва Сурхондарё вилоятларида 22 мартдан, Самарқанд вилоятида 24 мартдан, Жиззах вилоятида эса 28 мартдан зарарли чигирткаларнинг тухумдан чиққани аниқланган. Ҳозирда асосан 1–2 ёшдаги марокаш чигирткаси тарқалмоқда.

 

Мутахассислар томонидан ҳашаротларнинг аҳоли экин майдонлари ва томорқаларга етиб боришини олдини олиш мақсадида зарур чоралар кўрилмоқда. Чигирткалар аниқланган ҳудудларда кимёвий ишлов бериш ишлари олиб борилмоқда, кузатув ва назорат кучайтирилган.

 

Қайд этилишича, анъанавий равишда чигирткага қарши кимёвий кураш ишлари ҳар йили воҳа ҳудудларидан бошланиб, Қорақалпоғистон Республикаси ҳудудларида якунланади.

 

Айни пайтда кураш тадбирларига 53 та махсус пуркагичли автомашина, 194 та пуркагичли трактор, 1000 дан ортиқ моторли қўл пуркагичлари, 25 та сув ташувчи транспорт воситаси ҳамда 66 та мотоцикл жалб этилган. Шунингдек, ёқилғи-мойлаш маҳсулотлари ва кимёвий воситалар захираси шакллантирилган.

 

2026 йилда жами 651,8 минг гектар майдонда кимёвий ишлов ўтказилиши режалаштирилган. Ҳозирга қадар 22 минг гектардан ортиқ ҳудудда мониторинг олиб борилиб, 3 641 гектарда кимёвий кураш ўтказилган.

 

Чигирткага қарши курашни самарали ташкил этиш мақсадида барча вилоятларда махсус штаблар ва туманларда тезкор отрядлар тузилган. Республика бўйича кузатув ва кураш ишларига 700 га яқин мутахассис жалб этилган.

 

Мутахассисларнинг қайд этишича, мамлакатда 200 га яқин чигиртка тури мавжуд бўлиб, ҳар йили 6–8 турдаги зарарли, тўда ҳосил қилувчи чигирткаларга қарши кураш олиб борилади. Мавсум давомида хизматлар 24/7 режимда фаолият юритади.

 

Агентлик хабарида фуқаролардан зарарли чигирткалар тарқалган ҳудудлар ҳақида 1288 ёки 71 202 10 00 телефон рақамлари орқали хабар бериш сўралган. 

 

Таъкидланишича, кимёвий ишлов бериш ишлари бепул амалга оширилади.