Ўзбекистонда Тўловга қобилиятсизлик ишлари бўйича агентлик ташкил этилиши режалаштирилмоқда
Президент Шавкат Мирзиёев тўловга қобилиятсизлик институтини такомиллаштириш ҳамда молиявий қийинчиликка дуч келган тадбиркорлик субъектларини қўллаб-қувватлаш бўйича янги таклифлар билан танишди.
Шавкат Мирзиёев тўловга қобилиятсизлик институтини такомиллаштириш ҳамда молиявий аҳволи оғир тадбиркорлик субъектларини қўллаб-қувватлашга қаратилган янги ёндашувлар юзасидан тақдимот билан танишди.
Таъкидланганидек, мамлакатда хусусий бизнесни ривожлантириш ва тадбиркорлик фаолиятини қўллаб-қувватлаш бўйича изчил ислоҳотлар амалга оширилмоқда. Натижада бугунги кунда 300 мингдан ортиқ якка тартибдаги тадбиркор ва 5,5 миллион нафардан зиёд ўзини ўзи банд қилган шахс фаолият юритмоқда. Сўнгги беш йилда хусусий секторнинг иқтисодиётдаги улуши 45 фоиздан 58 фоизга ошди.
Тақдимотда молиявий қийинчиликка дуч келган корхоналарни эрта босқичда қўллаб-қувватлаш, банкротлик жараёнларини самарали ташкил этиш ва бизнесни сақлаб қолишга қаратилган тизимни такомиллаштириш зарурлиги қайд этилди.
Шу муносабат билан Адлия вазирлиги ҳузурида Тўловга қобилиятсизлик ишлари бўйича агентлик ташкил этиш, шунингдек суд бошқарувчилари фаолиятини мувофиқлаштирувчи Суд бошқарувчилари палатасини тузиш таклиф қилинди.
Бундан ташқари, молиявий аҳволи оғир тадбиркорлик субъектларини қўллаб-қувватлаш учун янги молиявий механизмлар жорий этиш, кредит ва солиқ қарздорликларини реструктуризация қилиш, судгача санация чораларини кенгайтириш ҳамда тўловга қобилиятсизлик жараёнларини рақамлаштириш бўйича таклифлар тақдим этилди.
Президент ишлаб турган корхоналарни сақлаб қолиш, вақтинча қийинчиликка учраган бизнес субъектларига ўз вақтида кўмак бериш ва уларни иқтисодий фаолликка қайтариш муҳимлигини таъкидлади. Мутасаддиларга соҳани халқаро тажриба асосида тубдан такомиллаштириш бўйича аниқ топшириқлар берилди.
