Афғонистонда зилзила оқибатида 8 киши ҳалок бўлди
Ер қимирлаши Афғонистонга чегарадош мамлакатларда ҳам қайд этилди.
Афғонистон шимоли ва Покистон ғарбида 3 апрель куни содир бўлган зилзила оқибатида 8 киши ҳалок бўлди.
Маълум қилинишича, жума куни кечқурун Афғонистоннинг шимолий қисми ва Покистоннинг ғарбий ҳудудларида 5,9 магнитудали зилзила юз берди. Расмийлар хабарига кўра, Кобул шаҳрида камида саккиз киши ҳалок бўлган.
Зилзила эпицентри Ҳиндукуш тоғ тизмасида, Афғонистоннинг Қундуз шаҳридан тахминан 150 километр шарқда жойлашган бўлиб, силкинишлар бутун Афғонистон ҳудудида, шунингдек Покистон ва Ҳиндистон, Ўзбекистоннинг айрим қисмларида ҳам сезилган.
Германиянинг Геология фанлари тадқиқот маркази (ГФЗ) маълумотига кўра, зилзила 177 километр (110 миль) чуқурликда содир бўлган.
Кобул вилояти ҳокими матбуот котиби Ҳафизуллоҳ Башаратнинг айтишича, Кобул чеккасида уй қулаб тушиши оқибатида бир оиланинг саккиз нафар аъзоси ҳалок бўлган, бир бола эса жароҳатланган.
