Эрон АҚШнинг иккита ҳарбий самолётини уриб туширди
Мазкур ҳодисада икки нафар учувчи қутқарилган, бир нафар учувчи эса бедарак йўқолган.
Эрон ва Форс кўрфази ҳудудида АҚШнинг иккита ҳарбий самолёти уриб туширилди. Бу ҳақда Reuters хабар берди.
Расмий маълумотларга кўра, икки нафар учувчи қутқарилган бўлса, яна бир учувчи бедарак йўқолган ва уни Эрон кучлари қидирмоқда.
АҚШ расмийлари ва Эрон томонининг тасдиқлашича, биринчи самолёт — F-15Е туридаги икки ўриндиқли қирувчи-бомбардимончи бўлиб, у Эрон томонидан ўққа тутилиб уриб туширилган. Иккинчи самолёт — А-10 Warthog ҳужумчи самолёти эса зарбадан сўнг Кувайт ҳудудида қулаган, учувчи эса катапульта орқали қутулиб қолган.
Бедарак йўқолган учувчини қидириш операцияси давомида жалб этилган АҚШнинг Black Hawk вертолётлари ҳам Эрон ҳужуми остида қолган, бироқ улар ҳудудни тарк этишга муваффақ бўлган. Ҳозирча экипаж аъзоларининг жароҳат даражаси ва йўқолган учувчининг тақдири номаълумлигича қолмоқда.
Эроннинг Ислом инқилоби қўриқчилари корпуси самолёт қулаган ҳудудда қидирув ишларини олиб бораётганини маълум қилди. Маҳаллий расмийлар эса “душман кучлари”ни қўлга олиш ёки йўқ қилишга муваффақ бўлганларга мукофот ваъда қилган.
Воқеалар фонида АҚШ президенти Доналд Трамп Оқ уйда қидирув-қутқарув операцияси бўйича ҳисоботларни қабул қилмоқда. Шу билан бирга, Пентагон ва АҚШ Марказий қўмондонлиги вазият юзасидан расмий изоҳ бермаган.
Мутахассислар қайд этишича, ушбу ҳодисалар АҚШ ва Исроил кучлари Эрон осмонида тўлиқ устунликка эга экани ҳақидаги баёнотларни шубҳа остига қўймоқда.
Аввалроқ Ислом инқилоби қўриқчилари корпуси Эрон ҳаво ҳудудида АҚШга тегишли F-35 қирувчи самолёти йўқ қилинганини маълум қилганди.
