Германияда 17–45 ёшдаги эркаклар учун чет элга чиқиш қоидалари кучайтирилади

Германияда эркакларнинг мамлакатдан чиқиш тартиби бўйича янги талаблар жорий этилди.

 

Frankfurter Rundschau нашрининг хабар беришича, чақирув тўғрисидаги қонунга киритилган ўзгартишларга мувофиқ, 17 ёшдан 45 ёшгача бўлган эркаклар Германияни уч ойдан ортиқ муддатга тарк этиш учун Бундесвердан рухсат олишлари керак бўлади.

 

Қайд этилишича, қонуннинг янгиланган талқини 2026 йил 1 январдан кучга кирган. Эндиликда ушбу талаб фақат фавқулодда вазиятларда эмас, балки доимий тартибда амал қилади.

 

Аввалроқ бундай чекловлар фақат икки ҳолатда — кескинлик ҳолати ёки мудофаа ҳолати эълон қилинган пайтда қўлланилган. “Кескинлик ҳолати” Бундестаг ёки НАТО томонидан ташқи таҳдид кучайгани расман тан олинган вазиятни англатади. “Мудофаа ҳолати” эса парламент томонидан мамлакатга қуролли ҳужум бўлганини тан олиш билан боғлиқ фавқулодда ҳолат ҳисобланади.

 

Янги тартибга кўра, чет элга ўқиш, ишлаш ёки узоқ муддатли сафар билан чиқишни режалаштираётган фуқаролар аввал Бундесвернинг тегишли марказига мурожаат қилиб, рухсатнома олишлари лозим.

 

Нашрнинг ёзишича, рухсатнома одатда шахс чақирувдан озод этилган муддатга берилади. Шу билан бирга, рухсатнома беришни рад этиш бўйича аниқ расмий қоидалар мавжуд эмас, бироқ ариза топшириш мажбурий ҳисобланади.

 

Германия Мудофаа вазирлиги вакиллари ушбу талаб энди фавқулодда вазиятлардан ташқарида ҳам амал қилишини тасдиқлади. Уларнинг таъкидлашича, мазкур чоралар зарурат туғилганда фуқаролар ҳақида тўлиқ маълумотга эга бўлиш мақсадида жорий этилган.

 

Шу билан бирга, рухсатнома олмаслик қандай оқибатларга олиб келиши масаласи ҳозирча очиқ қолмоқда.