Қорақалпоғистонда “Медиа ҳафталик”нинг илк босқичи якунланди

Ўзбекистон бўйлаб ўтказилаётган “Медиа ҳафталик”нинг дастлабки босқичи Қорақалпоғистон Республикасида якунланди. 

 

Маълум қилинишича, ҳафталик доирасидаги машғулотларга 60 дан ортиқ ахборот хизмати раҳбарлари ва ходимлари, ҳудудий ҳамда маҳаллий телеканалларнинг 80 дан зиёд вакиллари — мухбирлар, тасвирчилар, монтажчилар, режиссёрлар ва муҳаррирлар, шунингдек босма ва электрон ОАВнинг 50 дан ортиқ ходимлари жалб этилган. Бундан ташқари, мустақил блогерлар ҳам фаол иштирок этди.

 

Энг катта қатламни эса 500 нафардан ортиқ мобилограф, СММ мутахассислари, вайнерлар ва контент яратишга қизиқувчи ёшлар ташкил этди. Дастлабки эълонлардан сўнг иштирок этиш истагини билдирганлар сони ортиб, умумий ҳисобда 700 дан зиёд медиа вакиллари ягона мулоқот майдонида жамланди.

 

Ташкилотчилар таъкидлашича, “Медиа ҳафталик” анъанавий ўқув курсидан фарқли равишда ахборот узатишдаги эскича ёндашувлардан воз кечиб, замонавий медиа муҳитига мос янги қарашларни шакллантиришга хизмат қилган.

 

Ҳафталик давомида иштирокчилар сунъий интеллектдан фойдаланиш, креатив контент яратиш, ахборот хуружларига қарши курашиш, шунингдек инқирозли вазиятларда самарали коммуникация олиб бориш бўйича кўникмаларини оширди.

 

Машғулотлар бешта асосий йўналишда ташкил этилди. Жумладан, босма ва интернет нашрлари вакиллари учун сунъий интеллект даврида ахборот яратиш, рақамли этика ва фактчекинг воситалари бўйича дарслар ўтказилди. Телевидение вакиллари учун эса сиёсий ва иқтисодий мавзуларни замонавий форматда ёритиш, ҳужжатли фильмлар тайёрлаш ҳамда техник кўникмаларни ривожлантириш масалаларига эътибор қаратилди.

 

Давлат органлари ахборот хизматлари раҳбарлари стратегик коммуникация, антикризис бошқаруви, очиқлик индекси ва KPI тизимлари бўйича билимларини мустаҳкамлади. СММ мутахассислари ва блогерлар эса аудиторияни жалб этувчи мобил репортажлар тайёрлаш, визуал сторителлинг ва ижтимоий тармоқлар алгоритмлари билан ишлаш бўйича амалий тажриба орттирди.

 

Тадбир якунида иштирокчилар замонавий медиа муҳитида фаол ишлай оладиган, креатив ва рақобатбардош мутахассислар сифатида шакллангани таъкидланди. Шунингдек, ҳафталик давлат идоралари, журналистлар ва блогерлар ўртасида ўзаро ишонч ва ҳамкорликни мустаҳкамлашга хизмат қилгани қайд этилди.