Озарбайжон Эронга 200 тонна гуманитар ёрдам юборди
Бу Яқин Шарқдаги вазият кескинлашганидан буён учинчи ёрдам партиясидир.
Озарбайжон Эронга навбатдаги гуманитар ёрдам партиясини жўнатди. Мамлакат оммавий ахборот воситаларининг хабар беришича, инсонпарварлик ёрдами Ислом Республикаси аҳолисининг мавжуд эҳтиёжларини қондириш мақсадида юборилган.
Ёрдам жўнатиш тўғрисидаги қарор Озарбайжон Президенти Илҳом Алиев ҳамда Эрон Президенти Масъуд Пезешкиан ўртасида 2 апрель куни бўлиб ўтган телефон суҳбатидан сўнг қабул қилинган.
Умумий оғирлиги 200 тоннани ташкил этган гуманитар юк таркибига 190 тонна озиқ-овқат маҳсулотлари, 7 тонна дори-дармон воситалари ҳамда 3 тонна тиббий буюмлар киради. Инсонпарварлик ёрдами 10 та юк машинасида етказиб берилди.
Расмий маълумотларга кўра, бу Яқин Шарқдаги вазият кескинлашганидан буён Озарбайжон томонидан Эронга юборилган учинчи гуманитар ёрдам партиясидир.
Шунингдек, Эрон бошқа давлатлардан ҳам инсонпарварлик ёрдами олмоқда. Хусусан, Эрон Қизил Ярим Ой Жамияти раҳбари Пир Ҳусайн Холиванд маълум қилишича, Россия томонидан 330 тонна дори-дармон ва бошқа гуманитар юк етказилган.
Бундан ташқари, Эрон Қозоғистон, Хитой ҳамда Ироқдан ҳам ёрдам қабул қилган.
