Россия Украинанинг Краматорск шаҳрига авиабомба ташлади

Россия қўшинлари 3 апрель, жума куни кечқурун Украинанинг Донецк вилоятидаги Краматорск шаҳрига навбатдаги авиазарбани йўллади. Ҳужум оқибатида 4 киши ҳалок бўлди. Бу ҳақда DW хабар берди.

 

Донецк вилояти ҳарбий маъмурияти раҳбари Вадим Филашкиннинг сўзларига кўра, ҳалок бўлганлар орасида оғир жароҳатлар туфайли шифохонада вафот этган 16 ёшли ўсмир ҳам бор. Яна 4 киши жароҳат олган. Камида иккита маъмурий бино ҳамда кўплаб турар жойларга зарар етган.

 

Донецк вилояти прокуратураси Краматорскка  4 та ФАБ-250 туридаги фугас авиабомбаси ташланганини маълум қилган. Мазкур ҳолат юзасидан ҳарбий жиноят аломатлари бўйича судгача тергов ҳаракатлари бошланган.

 

Аввалроқ, кун ўрталарида ҳам шаҳар авиабомбалар билан нишонга олингани, натижада 2 киши ҳалок бўлиб, 3 киши жароҳат олгани хабар қилинган. Сўнгги маълумотларга кўра, 3 апрель куни Украина ҳудудига берилган зарбалар оқибатида жами 14 киши ҳалок бўлган.

 

Шунингдек, 4 апрелга ўтар кечаси Россия қуролли кучлари томонидан Суми шаҳрига ҳам дрон зарбаси берилган. Маҳаллий ҳокимият ҳужум оқибатида 4 киши жароҳат олганини, кўп қаватли уй квартираларида ёнғин юзага келганини билдирган.