Тошкентда ҳарбий парад сабаб айрим кўчалар вақтинча ёпилади
Амир Темур таваллудининг 690 йиллиги муносабати билан ҳарбий парад ўтказилади.
Тошкент шаҳрида 4 апрель куни Амир Темур таваллудининг 690 йиллиги муносабати билан ҳарбий парад ўтказилади. Бу ҳақда Мудофаа вазирлиги маълум қилди.
Маълум қилинишича, тадбир соат 08:00 да Ҳарбий хавфсизлик ва мудофаа университети ҳудудидан (“Пушкин” метро бекати яқинида) бошланиб, 12:30 га қадар давом этади. Ҳарбий бўлинмалар Паркент ва Мустақиллик кўчалари бўйлаб тантанали юриш қилади.
Парад давомида ҳарбий хизматчилар Амир Темур жанговар байроғини кўтарган ҳолда замонавий ҳарбий либослар, шунингдек, тарихий даврга оид кийим ва қурол-аслаҳаларда саф тортади. Амир Темур хиёбонида эса театр саҳналари, фахрий қоровул чиқишлари, қўл жанги усталарининг кўргазмалари ҳамда ҳарбий оркестрнинг махсус дастури намойиш этилади.
Тадбир якунида ҳарбий бўлинмалар Мустақиллик ва Темирйўл кўчалари орқали бошланғич манзилга қайтади. Шу муносабат билан 08:00 дан 12:30 га қадар мазкур кўчаларда автотранспорт ҳаракати вақтинча чекланади.
