Тошкентда “Қора либосли аёл ташрифи” китоби тақдимоти ўтказилди
Тадбир доирасида адабий чиқишлар, саҳна кўриниши ва китоб имзолаш маросими ташкил этилди.
Тошкентдаги Ҳайдар Алиев номидаги Озарбайжон Маданият марказида озарбайжон халқ ёзувчиси Мақсуд Иброҳимбековнинг “Қора либосли аёл ташрифи” асарининг ўзбек тилидаги нашри тақдимоти бўлиб ўтди.
Мазкур нашр Озарбайжон Маданият вазирлиги ҳамда Озарбайжоннинг Ўзбекистондаги элчихонаси ҳузуридаги Ҳайдар Алиев номидаги Озарбайжон Маданият маркази ҳамкорлигида тайёрланган.
Тадбирда илм-фан ва адабиёт вакиллари, маданият арбоблари, талабалар ҳамда Озарбайжон диаспораси вакиллари иштирок этди. Дастлаб ёзувчининг ҳаёти ва ижодига бағишланган видеолавҳа намойиш қилинди.
Маданият маркази директори Акиф Марифли ушбу нашр Илҳом Алиев ташаббуси билан ёзувчининг 90 йиллик юбилейи доирасида амалга оширилганини таъкидлади. У мазкур асар инсон руҳияти ва ҳаёт драмаларини чуқур бадиий ифода этувчи муҳим адабий асарлардан бири эканини қайд этди.
Тадбир давомида адабиётшунослар Жамила Шермуҳаммедова ва Эркин Нуриддинов асарнинг бадиий қиймати ва психологик чуқурлигига алоҳида тўхталиб ўтдилар. Шунингдек, таржимон Шаҳло Қосимова ушбу нашр икки халқ ўртасидаги адабий алоқаларни янада мустаҳкамлашга хизмат қилишини таъкидлади.
Тадбирда ёзувчининг турмуш ўртоғи Анна Иброҳимбекова ҳам иштирок этиб, муаллиф ижоди ҳақида ўз фикрларини билдирди.
Шунингдек, Харибулбул театри жамоаси томонидан саҳна кўриниши намойиш этилди, Қорабоғ Зафари рақс ансамбли эса миллий рақслар билан чиқиш қилди.
Тадбир якунида китобхонлар учун китоб имзолаш маросими ташкил этилди.
