Ўзбекистонда дори воситаларини рўйхатдан ўтказишда уларнинг халқаро миқёсдаги самарадорлиги ўрганилади
Дори воситаларининг самарадорлиги 12 та халқаро илмий манба асосида текширилади.
Эндиликда дори воситаларининг самарадорлиги халқаро илмий манбалар асосида текширилади. Бу ҳақда “Ҳуқуқий ахборот” Тelegram-каналида хабар берилди.
Маълум қилинишича, адлия вазирлиги дори воситаларини давлат рўйхатидан ўтказиш жараёнида уларнинг самарадорлигини аниқлаш тартибини белгиловчи идоравий ҳужжатни давлат рўйхатидан ўтказди.
Янги тартибга кўра, дори воситаларининг самарадорлиги 12 та халқаро илмий манба асосида текширилади. Ушбу жараён мустақил илмий экспертлардан иборат комиссиялар томонидан амалга оширилади.
Ўрганиш натижаларига кўра дори воситалари уч тоифага ажратилади:
• самарадорлиги исботланган дори воситалари (халқаро илмий манбаларда самарадорлиги тасдиқланган бўлса);
• самарадорлиги исботланмаган дори воситалари (халқаро манбаларга кўра самарадорлиги тасдиқланмаган бўлса);
• самарадорлиги ўрганилмаган дори воситалари (халқаро илмий манбаларда бу борада маълумот мавжуд бўлмаса);
Ўрганиш натижалари Соғлиқни сақлаш вазирлиги ҳузуридаги Фармацевтика маҳсулотлари хавфсизлиги маркази давлат муассасасининг расмий веб-сайтида мунтазам эълон қилиб борилади.
