Доғистонда кучли ёмғир сабаб уч қаватли бино қулаб тушди

Доғистонда 5 апрел кечаси кузатилган кучли ёғингарчилик бир қатор ҳудудларда сув тошқинларига сабаб бўлди. Энг оғир вазият Махачкала ва Дербент шаҳарларида қайд этилган.

 

Маҳаллий расмийлар маълумотига кўра, кучли жала натижасида айрим кўчалар ва турар-жой ҳудудлари сув остида қолган. Махачкаладаги Айвазовский кўчасида жойлашган олти қаватли кўп қаватли уй жала сувлари оқибатида зарарлангани сабабли бинодаги аҳоли эвакуация қилинмоқда. Фавқулодда вазият жойига қутқарув экипажлари ва автобуслар юборилган.

 

Ижтимоий тармоқларда сув тошқини туфайли эвакуация қилинаётган бино яқинидаги уч қаватли бинoнинг қулаб тушгани акс этган фото ва видеолар тарқалди. Ҳозирча жабрланганлар ҳақида маълумот берилмаган.

 

Кучли ёмғир оқибатида республикaнинг 139 та аҳоли пунктида электр таъминотида узилишлар юзага келган. Фавқулодда вазиятлар хизматлари маълумотига кўра, бунга электр узатиш линияларидаги қисқа туташувлар сабаб бўлган.

 

Шунингдек, Дербент ва Махачкала шаҳарлари кўчаларида транспорт ҳаракати қийинлашган, айрим йўллар вақтинча ёпилган. Дербентда сув босган ҳовлилардан бирида қутқарувчилар бир аёл ва болани эвакуация қилиб, уларни вақтинчалик бошпанaга жойлаштирган.

 

Дербент–Махачкала автомагистралининг айрим қисмлари ҳам сув остида қолган. Қутқарувчилар одамларни хавфли ҳудудлардан ўт ўчириш машиналари ва бошқа махсус техникалар ёрдамида олиб чиқмоқда.

 

Айни пайтда Доғистоннинг фавқулодда хизматлари кучайтирилган режимда ишламоқда ва сув тошқинлари оқибатларини бартараф этиш чоралари кўрилмоқда.