Эрон ҳаво ҳудуди 12 апрелгача ёпиқ қолишини режалаштирмоқда

Эрон расмийлари мамлакат ҳаво ҳудуди камида 12-апрелга қадар ёпиқ ҳолда қолишини режалаштирмоқда. Бу ҳақда ТАСС агентлиги хабар берди.

 

Маълум қилинишича, чекловлар асосан фуқаролик авиацияси парвозларига тааллуқли бўлади. Шу билан бирга, айрим истиснолар ҳам кўзда тутилган. Хусусан, давлат, ҳарбий ва тиббий авиация рейслари, шунингдек, махсус рухсатнома олган айрим парвозларга рухсат берилиши мумкин.

 

Минтақада кескинлик 28 февралдан буён ортиб бормоқда. Исроил, АҚШ ва Эрон ўртасидаги қарама-қаршилик кучайгани фонида Эрон бир неча бор Яқин Шарқдаги айрим давлатлар ҳудудларига зарбалар бергани ҳақида хабарлар берилган эди. Эрон расмийлари эса ушбу ҳужумлар АҚШ ҳарбий базаларига қаратилганини билдирган.

 

Шунингдек, Эрон Туркия ҳудудига ҳужум қилинганини рад этган. Яқин Шарқдаги қатор давлатлар Теҳроннинг ҳаракатларини танқид қилган. Жумладан, БАА мамлакатдаги элчихонасини ёпиб, элчисини чақириб олди, Саудия Арабистони эса жавоб чораларини кўриши мумкинлигини билдирди.

 

Бундан ташқари, Эрон томонидан Ҳормуз бўғози амалда ёпилгани ҳақидаги хабарлар фонида жаҳон энергия бозорида нархлар кескин ошгани қайд этилмоқда. Эрон Олий раҳбари давлат телевидениеси орқали эълон қилинган баёнотида ушбу блокададан таъсир воситаси сифатида фойдаланиш зарурлигини таъкидлаган.