Эрон Ироқ кемаларига Ҳормуз бўғозидан ўтишга рухсат берди
Чекловлар фақат душман давлатлар кемаларига нисбатан қўлланади.
Эрон расмийлари Ироқ кемаларига Ҳормуз бўғози орқали эркин ўтишга рухсат берилганини маълум қилди. Бу ҳақда Эрон Қуролли кучларининг марказий штаби — Хатам ал-Анбия баёнотига таяниб Al Alam TV хабар берди.
Баёнотда айтилишича, Эрон томонидан жорий этилган чекловлар Ироққа нисбатан қўлланилмайди.
“Биродар Ироқ Ҳормуз бўғозига қўйилган чекловлардан озод қилинди”, — дейилади расмий баёнотда.
Шунингдек, Эрон ҳарбийлари таъкидлашича, мамлакат томонидан киритилган қатъий чекловлар фақат душман давлатларнинг танкер ва қўйма юк ташувчи кемаларига нисбатан амал қилади. Бу ҳақда TASS ҳам хабар берган.
Аввалроқ Яқин Шарқдаги кескинлик ортиб бораётган бир пайтда АҚШ ва Исроил Эронга қарши қўшма ҳарбий операция бошлагани маълум қилинган эди. Шундан сўнг Эрон Исроил ҳудудларига ракета зарбалари берган ҳамда Форс кўрфазидаги АҚШ ҳарбий базаларига ҳужум қилгани ҳақида хабарлар тарқалган эди.
Шунингдек, минтақадаги кескин вазият сабаб бир қатор давлатлар ҳаво ҳудудларини вақтинча ёпган эди.
