Эрон Яқин Шарқда АҚШ ва Исроилнинг нефть-газ инфратузилмаларига зарба берди
БАА, Баҳрайн ва Қувайтдаги айрим нефть-газ объектлари ҳамда заводлар дрон ва ракета зарбалари билан нишонга олинган.
Эрон Ислом инқилоби қўриқчилари корпуси (IRGC) Форс кўрфази минтақасидаги бир қатор мамлакатларда жойлашган АҚШ ва Исроил билан боғлиқ объектларга зарбалар берилганини эълон қилди. Бу ҳақда Эроннинг Fars ахборот агентлиги хабар берди.
IRGC маълумотларига кўра, ҳужумлар жами бешта нишонга қаратилган. Хусусан, Исроил ҳаво кучлари қирувчи самолётларини ёқилғи билан таъминлайдиган Ҳайфа шаҳридаги нефтьни қайта ишлаш заводи кучли зарбага учрагани айтилмоқда. Натижада объектнинг асосий қисмлари жиддий зарар кўргани таъкидланган.
Шунингдек, БААнинг Хабшан ҳудудида жойлашган ва Американинг ExxonMobil ҳамда Chevron компанияларига тегишли газ иншоотлари ҳам ҳужум нишонига айланган. Бундан ташқари, Ар-Рувайс шаҳридаги АҚШ нефть-кимё заводига ҳам ракета зарбалари берилгани маълум қилинди. Мазкур объект АҚШ ҳарбийлари учун ёқилғи ҳамда Исроил учун ҳарбий маҳсулотлар ишлаб чиқаради.
Бундан ташқари, Баҳрайнда жойлашган ва АҚШ ҳарбийларини нефть маҳсулотлари билан таъминлайдиган нефть-кимё заводига дрон ҳужуми уюштирилгани билдирилди. Ҳужум оқибатида кучли ёнғин юзага келиб, объектнинг асосий қисмлари вайрон бўлгани қайд этилган.
Маълумотларга кўра, Қувайтнинг Шуайба ҳудудида жойлашган Америка объектлари ҳам зарар кўрган. Ушбу мажмуада юзага келган ёнғин АҚШ ҳарбийлари билан ҳамкорлик қиладиган ишлаб чиқариш фаолиятининг тўхташига сабаб бўлган.
Бундан ташқари, Баҳрайндаги BAPCO Energies нефтьни қайта ишлаш заводида ҳам дрон ҳужуми оқибатида ёнғин келиб чиққан.
Эрон 28 февралдан буён АҚШ ва Исроилнинг ҳужумларига жавобан Яқин Шарқдаги Америка ҳарбий базалари ҳамда нефть-газ инфратузилмаларига қарши зарбалар бераётганини билдирган.
