Самарқандда бедарак йўқолган аёлнинг жасади 3 ойдан бери топилмаяпти
Тахминларга кўра, у таниш йигит томонидан ўлдирилиб, жасади Дарғом каналига ташланган бўлиши мумкин.
Самарқандда бедарак йўқолган 38 ёшли аёлнинг ўлими билан боғлиқ ҳолат юзасидан янги тафсилотлар маълум бўлди.
"Миллар"нинг маълум қилишича, аёл 2025 йил 24 декабрь куни уйидан чиқиб кетганидан сўнг бедарак йўқолган. Яқинларининг айтишича, у ўша куни ишдан қайтиб, уйида бўлган, кейинчалик қарз масаласини ҳал қилиш баҳонасида таниш йигит билан учрашгани чиқиб кетган ва шундан сўнг қайтиб келмаган. Орадан кўп ўтмай унинг телефони ҳам ўчган.
Қариндошларнинг билдиришича, гумонланувчи аввал ҳам марҳумадан автомобил ижарага олиб, тўловни бермасдан қочиб юрган. Тахминларга кўра, улар ўртасида юзага келган жанжал оқибатида аёлга пичоқ билан зарба берилган, сўнгра бўғиб ўлдирилган бўлиши мумкин.
Шунингдек, гумонланувчи аёлнинг жасадини Spark автомобилида олиб келиб, Дарғом канали ҳудудига ташлагани тахмин қилинмоқда. Марҳуманинг яқинлари жасад Равотхўжа ҳудуди яқинида сувга ташланган бўлиши мумкинлигини билдирган.
Бироқ ҳодисадан буён уч ойдан ортиқ вақт ўтганига қарамай, жасад ҳозиргача топилмаган. Дастлаб қидирув ишлари 27 январгача давом этган, кейинчалик эса тўхтатилган. 2026 йил 25 март куни сув вақтинча тўхтатилиб, яна қидирув ўтказилган, аммо бу ҳам натижа бермаган.
Самарқанд вилояти прокуратураси маълумотига кўра, мазкур ҳолат юзасидан Жиноят кодексининг 97-моддаси 1-қисми (қасддан одам ўлдириш) билан жиноят иши қўзғатилган. Ҳозирда тергов ҳаракатлари олиб борилмоқда.
