Трамп 48 соатдан кейин Эронга “дўзах ёғилиши“ни айтди
Эрон келишувга эришиши ёки Ҳормуз бўғози масаласини ҳал қилиши учун берилган муддат якунланмоқда.
Дональд Трамп Эрон билан музокаралар масаласида кескин баёнот бериб, агар Теҳрон яқин 48 соат ичида келишувга эришмаса ёки Ҳормуз бўғози билан боғлиқ масалада муросага келмаса, жиддий чоралар кўрилиши мумкинлигини маълум қилди.
АҚШ президенти бу ҳақда ўзининг Truth Social ижтимоий тармоғидаги саҳифасида ёзган. Унинг таъкидлашича, аввалроқ Эрон томонига келишувга эришиш ёки Ҳормуз бўғози масаласини ҳал қилиш учун 10 кунлик муддат берилган эди.
“Эрон келишувга эришиши ёки Ҳормуз бўғозини очиши учун ўн кун берилганини эсланг. Вақт тугаяпти – барча дўзах очилишига 48 соат қолди”, — деб ёзган АҚШ раҳбари.
Аввалроқ АҚШ Эроннинг энергетика инфратузилмасига эҳтимолий зарбаларни вақтинча тўхтатиб туришини маълум қилган эди. 23 март куни Вашингтон Теҳрон билан музокаралар давом этаётганини билдириб, ҳарбий босимни бир неча кунлик муддатга тўхтатганини эълон қилган.
26 март куни эса Трамп бу муддатни 6 апрелгача узайтирганини айтиб, музокаралар давом этаётганини ва улар “ижобий руҳда” ўтаётганини таъкидлаган. Шу билан бирга, АҚШ раҳбари айрим ОАВларда тарқалган салбий хабарларни “сохта маълумотлар” деб атаган.
Маълумотларга кўра, Теҳрон аввал АҚШ томонидан таклиф қилинган бир қатор шартларни рад этган ҳамда айрим масалаларда қўшимча талаблар қўйган.
