Умрага борган 170 дан ортиқ Ўзбекистонлик Ватанга қайта олмаяпти
Саудия Арабистонида 14 кунлик умра сафарида қатнашган Ўзбекистон фуқаролари ташкилотчиларнинг нотўғри маълумотлари сабаб қайтишда қийинчиликка дуч келмоқда.
Бош консулхона маълумотларига кўра, умра зиёрати учун келган 170 дан ортиқ Ўзбекистон фуқароси ҳозирга қадар Ватанга қайта олмаган. Бу ҳақда “Дунё” ахборот агентлиги хабар берди.
Дипломатлар “Kanari” ва “Al-Ayam Elite” меҳмонхоналарига ташриф буюриб, зиёратчиларнинг ҳолатини жойида ўрганишди. Суҳбат давомида, кўпчилик қария ёшдаги, инфаркт, қандли диабет, қон босими каби сурункали касалликларга чалинган шахслар эканлиги, шунингдек, улар доимий дору-дармон қабул қилишини маълум қилди.
Маълум бўлишича, зиёратчилар 14 кунлик умра сафари доирасида турли гуруҳлар таркибида Саудия Арабистонига келган, бироқ сафарни ташкил этган шахслар томонидан берилган нотўғри маълумотлар ва хатолар туфайли Ватанга қайта олмаяпти.
Бош консулхона вакиллари шунингдек, сўнгги йилларда рухсатномасиз туристик фирмалар ва жисмоний шахслар томонидан тартибсиз умра сафарлари ташкил этилиши кўплаб фуқароларни қийин аҳволга солаётганини таъкидлади.
Шу билан бирга, расмий лицензияга эга 14 та фирма орқали умра сафарлари расмий тарзда ташкил этилаётгани ва бу ҳақда мунтазам ахборот бериб борилаётгани айтилди.
Зиёратчиларга Ватанга қайтиш бўйича мурожаатлари Бош консулхона томонидан тегишли идораларга етказилгани ва кўриб чиқилиши маълум қилинди. Шунингдек, вазият оғирлашмаслиги учун имкониятдан келиб чиққан ҳолда авичипта харид қилиш ва Ўзбекистонга қайтиш тавсия қилинди.
Ҳозирги кунда мазкур ҳолат Бош консулхона томонидан доимий назорат остида бўлиб, вазиятни ҳал этиш учун чора-тадбирлар амалга оширилмоқда.
