Жиззахда Nexia ва Cobalt тўқнашуви оқибатида 5 киши ҳалок бўлди
ЙТҲ қурбонлари орасида 54 ёшли Хитой фуқароси ҳам бўлгани айтилмоқда.
Жиззах вилояти Фориш туманида содир бўлган йўл-транспорт ҳодисаси оқибатида 5 киши ҳалок бўлди. Бу ҳақда Kun.uz нашри хабар берди.
Маълумотларга кўра, ҳодиса 4 апрел куни соат 16:05 атрофида Жиззах–Боғдон–Қизилча автомобил йўлида юз берган.
Навоий вилояти Хатирчи туманида яшовчи 27 ёшли ҳайдовчи бошқарувидаги Nexia автомобили қувиб ўтиш қоидасини бузган.
Оқибатда автомобил қарама-қарши йўналишда ҳаракатланиб келаётган, Фориш туманида яшовчи 35 ёшли ҳайдовчи бошқарувидаги Cobalt билан тўқнашган.
Йўл-транспорт ҳодисаси натижасида ҳар икки автомобил ҳайдовчиси, шунингдек Nexia автомобилида йўловчи сифатида кетаётган 54 ёшли Хитой фуқароси воқеа жойида ҳалок бўлган.
Шунингдек, Cobalt автомобилидаги икки нафар йўловчи оғир тан жароҳатлари билан шифохонага олиб борилган, бироқ кўрсатилган тиббий ёрдамга қарамай улар ҳам вафот этган.
Ҳодиса юзасидан ҳозирча расмий идоралар томонидан қўшимча маълумот берилмаган.
