Андижон вилояти ҳокими ўринбосари 50 минг доллар пора билан ушланди

Андижон вилояти ҳокимининг туризм, маданият, маданий мерос ва оммавий коммуникациялар бўйича ўринбосари Исманов Исомиддин Бахриддинович пора олаётганда ушланди.

 

Маълум қилинишича, Давлат хавфсизлик хизмати вилоят бошқармаси ходимлари томонидан 2026 йил 4 апрель куни фуқаро С.Р.Т.нинг мурожаати асосида тезкор тадбир ўтказилган. Тадбир давомида мансабдор шахс 50 минг АҚШ доллари миқдоридаги пулни олаётган пайтда ашёвий далиллар билан ушланган.

 

Хабарга кўра, Исманов фуқаро С.Р.Т.га тадбиркорлик фаолиятини бошлаш учун Бобур шаҳри ҳудудидаги давлат захирасида бўлган 20 сотих ер майдонини вилоят қурилиш ва уй-жой коммунал хўжалиги бош бошқармаси бошлиғи орқали аукционга қўйдириб, унинг номига расмийлаштириб ва келгусида ушбу жойда қурилиш учун рухсатнома олиб беришини айтган. Ушбу хизмат эвазига у ҳар бир сотих ер учун 2 500 АҚШ долларидан жами 50 минг доллар талаб қилган.

 

Тезкор тадбирда С.Р.Т. томонидан кимёвий ишлов берилган пул маблағлари Исмановга унинг яшаш хонадонида топширилган пайтда мансабдор қўлга олинган.

 

Мазкур ҳолат юзасидан И.Б.Исмановга нисбатан Жиноят кодексининг 25, 168-моддаси 4-қисми “а” банди ва 28, 211-моддаси 3-қисми “а” банди билан жиноят иши қўзғатилган. Б.Исманов Жиноят-процессуал кодексининг 221-моддаси тартибида ушланган.

 

Маълумот учун, Исомиддин Исманов 2022-2025 йилларда Андижон вилояти ИИБ бошлиғининг ўринбосари – Жамоат хавфсизлиги хизмати бошлиғи, 2025 йил май ойидан ИИВ Тезкор-қидирув департаменти, тезкор вазиятни таҳлил қилиш бошқармаси бошлиғи лавозимида ишлаган.

 

2025 йил декабрь ойида Андижон вилояти ҳокимининг туризм, маданият, маданий мерос ва оммавий коммуникациялар масалалари бўйича ўринбосари лавозимига тайинланган.